Abuzimet me tenderët në vendin tonë po shtohen si “kërpudhat pas shiut”, madje dhe Gijotina.com ka denoncuar me raste konkrete dhe dokumente vërtetuese aferat korruptive që bëhen nga institucionet publike përmes kontratave tenderuese. Tashmë vetë KPP ka treguar në rapotin e publikuar së fundmi se vetëm në dhjetor të vitit 2021 janë paraqitur 66 ankesa nga kompani të ndryshme, për shkelje që ka bërë autoriteti kontraktues me tenderët. Madje theksohet se ka dhe më shumë se 2 ankesa për të njejtin tender.
Më tutje, referuar vendimmarrjeve të KPP-së, rezulton se 31 prej këtyre ankesave apo rreth 50% e tyre janë pranuar. Kjo do të thotë se, ky dikaster i ka dhënë të drejtë operatorëve ekonomikë, në drejtim të vendosjes së kritereve për të marrë pjesë apo për t’u kualifikuar në një tender për punë, mallra apo shërbime, duke rrëzuar institucionet shtetërore, që shpesh herë janë kritikuar për vendosjen e kritereve selektive, me qëllim shpalljen fitues të operatorëve të paracaktuar.
Ndërkaq, nuk mungojnë as rastet kur Komisioni i Prokurimit Publik iu ka dhënë të drejtë operatorëve ekonomikë, në drejtim të vlerësimit të ofertave, duke pranuar ankesat e tyre. Në këtë kuadër, edhe Agjencia e Prokurimit Publik ka nxjerrë dje një rekomandim për institucionet në drejtim të hartimit të procedurave, për shpenzimin e parave publike.
Kujtojmë se, rekomandimi bazohej në verifikimin e ligjshmërisë për procedura prokurimi, të zhvilluara gjatë periudhës 2019-2020, ku ishin konstatuar një sërë shkeljesh dhe mangësish, kryesisht në drejtim të përllogaritjes së fondit limit, por edhe vendosjes së kërkesave të veçanta të kualifikimit, që shpesh herë janë konsideruar të qëllimshme për favorizimin e operatorëve të caktuar ekonomikë dhe skualifikimin e të tjerëve.
Madje, vetëm disa ditë më parë miratoi edhe udhëzuesin e konfliktit të interesit, duke synuar shmangien e cenimit të paanësinë dhe pavërtetësinë në vendimmarrjen e procedurës së prokurimit.
Discussion about this post