Abuzimi me fondet e IPARD, ambasadorja e BE: Ka një hetim, presim…

Bashkimi Europian pezulloi më 21 korrik të këtij viti grantet e bujqësisë në Shqipëri, në kuadër të programit IPARD, pas një hetimi të nisur nga OLAF, për korrupsion dhe abuzime me këto fonde përsa i takon shpërndarjes së tyre.

Lidhur me këtë skandal korrupsioni nga ana e AZHBR-së dhe Qeverisë shqiptare, është pyetur në intervistën e saj të fundit si ambasadore e Bashkimit Europian në Shqipëri, Christiane Hohmann.

Ndërsa ka kërkuar nga SPAK që të prodhojë rezultate konkrete në luftën kundër korrupsionit, ajo sqaron se raporti përfundimtar i OLAF për shkeljet në Shqipëri nuk është bërë ende publik.

Gjithsesi ambasadorja shpjegoi se pagesat e fondeve për bujqësinë u pezulluan, pasi BE-ja po mbron paratë e taksapagueesve të saj.

“Jemi në mes të një procesi ku kishim njerëz që në fakt u ankuan për keqmenaxhimin e fondeve nga agjencia për menaxhimine fondeve të IPARD, kështu që institucioni i Brukselit i quajtur OLAF, i cili siguron të ndiqet mashtrimi, në fakt e shqyrton çështjen dhe ata bënë një hetim.

Pra, ata kanë përfunduar hetimin dhe kanë informuar Komisionin Evropian për gjetjet e tyre paraprake. Nuk e kemi parë ende raportin përfundimtar. Këto gjetje paraprake thonë se ka një problem, dhe më pas në mënyrë automatike ka një detyrë të Komisionit Evropian për të mbrojtur fondet e BE-së, të cilat në fund të fundit janë të taksapaguesve europianë.

Pra, kjo është ajo ku jemi për momentin, është koha e mbrojtjes. Në këtë moment ne ndalojmë çdo gjë përpara se të marrim raportin përfundimtar dhe pastaj mund të arrijmë në fund të tij, por kjo nuk do të thotë se bujqësia dhe fermerët nuk po bëjnë punë të mirë.

Padyshim ka pasur diçka që nuk ka funksionuar si duhet në përdorimin e fondeve, në përvetësim, por nga ana tjetër është edhe puna e ndershme e fermerëve.

Pra, mendoj se duhet të bëjmë dallimin midis asaj që ne shohim se mund të bëhet në terren dhe asaj që ndodhi, dhe ne duhet të shkojmë në fund të saj.

Por kjo nuk do të thotë se nuk ka më asistencë në dispozicion, tani do të qartësojmë gjithçka dhe më pas vazhdojmë,” tha Hohmann.