Aurora Mulla, inxhiniere tekstile në Policinë e Shtetit dhe Ylber Pjetërnikaj, zyrtar në Ministrinë e Brendshme po merren në pyetje si persona nën hetim për abuzimin me tenderin e uniformave të Policisë me vlerë 2.8 miliardë lekë.
Pjetërnikaj ka rezultuar të ketë hequr firmën nga tenderi, teksa ka pretenduar se kishte refuzuar të firmoste për shkak të parregullsive që kishte konstatuar, e nga ana tjetër edhe zyrtarja e Policisë ka treguar se është tërhequr nga procedurat për shkak të këtyre parregullsive, megjithatë, në asnjë rast këta persona nuk i kanë denoncuar këto shkelje.
Dyshimet e SPAK për shkelje janë ngritur dhe më shumë edhe nga dëshmitë e marra nga personat e tjerë të paraburgosur për këtë çështje.
Më herët, GjKKO la në fuqi masën “arrest me burg” për Edlira Naqellarin, ish-drejtoreshën e Prokurorimeve Publike, e cila përfundoi pas hekurave pas zbulimit të tenderit abuziv me uniformat e policisë. Naqellari kishte kërkuar zbutje të masës së sigurisë, por kjo kërkesë u refuzua.
Kujtojmë se SPAK mësyu në Ministrinë e Brendshme më 10 korrik, ku u arrestuan ish-drejtoresha e Agjencisë së Blerjeve të Përqendruar, Edlira Naqellari dhe bashkëpunëtorët e saj anëtarët e njësisë së prokurimit, Flutura Çekrezi, Anisa Bogdani, Ani Omuri, Kleivis Hasani dhe anëtarët e komisionit të vlerësimit të ofertave, Kreshnik Bejkaj, Fatmir Demneri, Mariglen Buzali dhe Gëzim Mingaj. SPAK ka përgjuar dhe vëzhguar 9 zyrtarët dhe ish-zyrtarët e Ministrisë së Brendshme, ndërsa kanë qenë bashkëpunëtorët e drejtësisë ata që kanë “zbërthyer” skemën e abuzimit me tenderin.
