Gjykata e Posaçme kalon për gjykim dosjen në ngarkim të ish-sekretares së Përgjithshme të Ministrisë së Shëndetësisë, Joana Duro si dhe specialistes, Laureta Shteto.
Togat e zeza të GJKKO-së pranuan kërkesat e të pandehurave për gjykim të shkurtuar.
Dy ish-zyrtaret akuzohen për korrupsion teksa Duro sipas SPAK mori 330 mijë lekë të reja për të favorizuar kompaninë “DRICONS” në një tender të hapur nga Ministria për supervizimin për rikonstruksionin e qendrave shëndetësore në Tiranë dhe Durrës.
Duro nuk ka pranuar akuzën dhe ka deklaruar se ka kryer vetëm detyrën, por ndryshe arsyetoi organi i akuzës që thotë se disponon prova ndaj ish-zyrtares.
Sipas SPAK, Joana Duro, shumën e parave e ka marrë si ryshfet nga Vladimir Topi administratori i kompanisë me qëllim për të përfituar në mënyrë të paligjshme nga tenderi i zhvilluar në Ministrinë e Shëndetësisë e Mbrojtjes Sociale, me objekt “Lot 1 “Supervizim për rikonstruksionin e disa Qendrave Shëndetësore në qarqet Tiranë e Durrës”.
Fituesi i tenderit me fond limit 805 mijë lekë ishte shpallur më datën 1 qershor të këtij viti, ndërsa SPAK ndërhyri më datën 2 teksa u dha rryshfeti. Kompania DRICONS është shpallur fituese me ofertën 672 mijë lekë.
Në seancë, Joana Duro, përveç faktit se nuk ka pranuar akuzën, ka kërkuar rikualifikim të veprës penale, nga korrupsion të funksionarëve të lartë shtetëror në korrupsion të funksionarëve publik, duke sjellë si situatë krahasuese Alqi Bllakon që akuzohet për inceneratorët. Gjykata e rrëzoi kërkesën e Duros, duke arsyetuar se për rikualifikimin e veprës penale nuk mund të sillet si referencë rasti i Alqi Bllakos pasi nuk ka një vendim unifikues të Gjykatës së Lartë lidhur me këtë çështje.
Discussion about this post