SPAK ka kërkuar masën “Arrest me burg” për Thoma Gëllçin, i cili akuzohet për shpërdorim detyre.
Ka nisur seanca për Thoma Gëllçin dhe tre ish-vartësit e tij Julian Tapia, Alban Malaveci dhe Ervin Muraj. Për 3 personat e tjerë të cilët ishin pjesë e Komisionit të Vlerësimit të Ofertave, është ngritur akuza e pabarazisë në tendera.
Gjyqtare e çështjes është Flora Haredinaj, e cila më pas do të pranojë apo jo kërkesën e prokurores Dolorez Musabelli, për masën e sigurisë “Arrest me burg”.
Sipas dosjes së shqyrtuar nga SPAK, Gëllçi ka shpallur procedurën e tenderit përpara se të merrte miratimin nga AMA dhe Bordi, për hapjen e kanalit TVSH AGRO. Në tenderin për blerjen e pajisjeve, kanë qenë dy kompani EURO contact dhe TBS 96. Anëtarët e KVO kanë shpallur TBS 96 fituese edhe pse kishte ofertë 20 mln më të lartë. Për të dyja kompanitë janë zbuluar parregullsi në dokumentacion dhe ndaj ato duhet të ishin skualifikuar.
