Një tjetër rast i dhunës seksuale është raportuar në Lushnjë. Në pranga ka rënë i riu i identifikuar me iniciale F. H., 19 vjeç, banues në Cërrik, Elbasan, pasi dyshohet se ka kryer marrëdhënie seksuale me një shtetase të mitur 11 vjeçe, banuese në Lushnjë.
Rastet e dhunës seksuale në vend kanë marrë përmasa të frikshme. Vetëm pak ditë më parë, opinioni publik u trondit nga një rast i rëndë dhune seksuale dhe fizike që ishte ushtruar ndaj një 6 vjeçareje, nga babi i saj, ndërsa dëshmitare ka qenë dhe nëna.
Më 28 tetor në orën 19.00, e mitura ka përfunduar në spitalin e Traumës në Tiranë, në gjendje mjaft të rëndë. Me dyshimet se ndaj saj mund të kishte pasur abuzim seksual, ishin mjekët ata të cilët njoftuan policinë, duke bërë që të nisin hetimet.
Mësohet se nëna e vajzës ka parë disa skena që i ati e qëllonte të voglën me thupër, por në një deklaratë të dyshimtë dhe absurde, nëna mësohet të jetë shprehur se mendonte “se e kishte ngaqë e kishte marrë malli”, pas shumë viteve që babai kishte qëndruar larg tyre.
