Duhet një Parti Demokratike e re, jo me gjuhë shantazhi dhe e shkëputur nga Sali Berisha. Kështu shprehet për emisionin “Kontrast” deputetja Flutura Açka, e pozicionuar në krah të Lulzim Bashës në atë që njihet si PD zyrtare.
Ajo tha se të ardhmen e PD-së e shikon të ndarë nga Sali Berisha, ndërsa shprehet se nga 1990 deri më sot PD ka bërë gabime të mëdha.
“14 maji krahasuar me zgjedhjet e 2021 tregoi se kemi shumë shqiptarë që nuk votuan. A ka një përgjegjësi politika për këtë pjesë të shqiptarëve që nuk do ta kthejë kokën te politika? Duhet një PD e re jo me gjuhë shatazhi, e shkëputur nga Berisha. Duhet një PD që jep llogari”, tha ajo.
Duke u ndalur te gabimet e rënda të PD-së, Açka përmendi tragjedinë e Gërdecit, ndërsa theksoi se duhet të ndërtojmë një parti transparente dhe që jep llogari.
“Duke nisur nga parrulla e famshme bashkëfajtor, bashkëvuajtës. S’kemi qenë të gjithë bashkëfajtore, ndahen njerëzit. Piramidat. Një nga gabimet e mëdha ka qenë Gërdeci, u vranë 26 vetë, u gjymtuan shumë të tjerë dhe u hodhën në erë mijëra para.
Nuk e dimë sot se kush është fajtori. Mendoj se një shqiptar i rafinuar e ka menduar këtë gjë dhe ka nevojë ta dijë se çfarë ka ndodhur me 30 vite të tranzicionit shqiptar. PD e ka për detyrë të jetë transparente nga tani e tutje”, shtoi Açka.
Discussion about this post