Gjykata e Posaçme Antikorrupsion ka caktuar ‘arrest shtëpie’ për administratorin e kompanisë publike “ECO-ELB”, Leli Kaja. Ky i fundit u arrestuar dy ditë më parë në Elbasan. Kaja u vu në pranga nga agjentë të BKH-së në lagjen “Fushë Mbret” të Elbasanit, ndërsa akuzohet se mori një zarf me 4 mln lekë ryshfet nga një biznes.
Emri i Leli Kajës ishte përfshirë më herët në hetimin e Prokurorisë së Elbasanit për aktivitetin e “ECO-ELB”. Në korrik 2025, në kuadër të këtij hetimi u kryen 14 kontrolle në banesa të personave të lidhur me çështjen, mes tyre edhe banesa e administratorit të kompanisë.
Hetimi, i regjistruar që në vitin 2024, është fokusuar te marrëdhëniet institucionale dhe financiare mes “ECO-ELB” dhe tetë bashkive të qarkut Elbasan. Prokuroria kishte marrë në pyetje 43 persona, ndërsa në fokus ishin vendosur edhe zyrtarë vendorë, përfshirë zëvendëskryetarë bashkish, drejtues juridikë dhe drejtues të financave.
Dyshimet e ngritura nga hetuesit lidhen me raste kur shërbimet mund të jenë kryer vetëm pjesërisht, për periudha të kufizuara ose të mos jenë kryer, pavarësisht pagesave të realizuara.
Discussion about this post