Adoleshenti i varur nga cigaret elektrike tregon tmerrrin kur nisi të kolliste gjak

Një adoleshent i traumatizuar britanik ka treguar për mediat sesi përfundoi në spital prej stilit helmues të jetesës me ushqime të shpejta dhe shumë cigare elektrike.

Jayden Richardson thotë se kishte nisur të tymoste cigare elektrike prej moshës 13 vjeç ‘për t’u dukur si të tjerët’, duke pirë ekuivalenten e rreth 50 cigareve në ditë. Por tashmë 17 vjeçari thotë se u tmerrua kur nisi të kollitej gjak gjatë pushimeve me familjen në Turqi, në gusht 2024.

Pasi u kthye në shtëpi një ditë më vonë, nëna e tij Elita Richardson e dërgoi në spital ku doktorët i thanë se kishte ulçër të stomakut prej pijeve me gaz, sufllaqeve e ushqimeve të shpejta që hanin çdo natë me pushime.

Familja u shokua edhe më shumë kur një endoskopi zbuloi dëme të rënda në mushkëri për të cilat doktorët thanë se ishin shkaktuar nga varësia e tij ndaj cigareve elektrike. I riu ishte i vendosur të linte cigaret elektrike, por tymosi gjatë festimit të ditëlindjes më 10 janar, kur dhe rinisi të kollitej gjak.

Zhvillimi vjen disa ditë pas vdekjes së aktorit britanik Paul Danan, pas disa mujash në spital prej varësisë ndaj cigareve elektrike, shkruan rrjeti vendas The Mirror.

Jayden është tashmë duke pritur rezultatin e analizave dhe mirëpret ndalimin e cigareve një-përdorimshe në qershor në Britani, duke u zotuar se nuk do t’i prekë më kurrë. “Isha i tmerruar, nuk e dija që cigaret elektrike mund të shkaktojnë të gjitha këto”, thotë Jayden.

Nëna e tij 43 vjeçare Elita, në një postim në rrjetet sociale paralajmëronte të rinjtë “të mendojnë seriozisht për rreziqet e cigareve elektrike, pasi mund të të ndodhë edhe ty”.

Ajo kujton se telashet e të birit nisën me dhimbje gjoksi dhe më pas gjatë ditës nisi kolla e tmerrshme me gjak.

“Këto aparate ishin në modë por asnjëherë nuk i dihet çfarë kanë brenda, ato janë të mbushura me kimikate, janë të rrezikshme dhe adoleshentët nuk duhet t’i prekin”, tha ajo, sipas The Mirror.