Deputetja e PD-së dhe kryetarja e Komisionit Hetimor të Inceneratorëve Jorida Tabaku ka publikuar përgjigjen që ka marrë nga Ministria e Mjedisit dhe Turizmit lidhur me vendimin e 2014 për të shpallur emergjencën mjedisore në Shqipëri.
Sipas Tabakut në përgjigje ministria shprehet se një vendim i tillë i kësaj date nuk ekziston në protokollin e ministrisë.
“E gjithë alibia e shumicës socialiste për 3 inceneratorët me vlerë 430 mln euro rrotullohej rreth një vendimi që kishte shpallur emergjencën mjedisore në Shqipëri. Një vendim që kryeministri e valëviti në Komision Hetimor e që më pas u bë publike në një shkrim të BIRN ku kuptohej qartë nuliteti i këtij vendimi që do të thotë në fakt mosekzistenca e tij. Pikërisht për këtë vendim të marrë në shkurt 2014 i bëra një kërkesë zyrtare si deputete Ministrisë së Mjedisit dhe Turizmit. Mirëpo çuditërisht në përgjigjen e saj Ministria shprehet se një vendim i tillë i kësaj date nuk ekziston në protokollin e ministrisë”, shkruan Tabaku.
Deputetja i ka bërë thirrje SPAK që të “bashkojë të 3 çështjet e inceneratorëve në 1 të vetme, që të nisë një hetim të thelluar pasuror për çdo individ të përfshirë” në atë që ajo e quan “vjedhjen e shekullit”.
“Kjo do të thotë që 430 mln euro nga taksat e shqiptarëve janë dhënë me një vendim që nuk ekziston as në protokollin e Ministrisë së Mjedisit dhe Turizmit pra një vendim praktikisht inekzistent. Përgjigja e ministrisë do të thotë që janë dhënë 430 mln euro për 3 inceneratorët në favor të Gugalljas, Zotos dhe Mërtirit që në fakt fshehin pas tyre politikanët dhe ministrat e qeveritarët sot. Ndaj është jetike për SPAK që të bashkojë të 3 çështjet në 1 të vetme, që të nisë një hetim të thelluar pasuror për çdo individ të përfshirë në vjedhjen e shekullit”, shkruan Tabaku.
Ndër të tjera deputetja demokrate, raporti i opozitës sqaron skemën se si qeveria Rama ka shfrytëzua resurset për vjedhjen e 430 milionë eurove. Për këtë arsye, sipas Tabakut, SPAK nuk duhet të humbasë kohë dhe të veprojë pa u ndikuar nga sulmet politike.
“Raporti i opozitës të cilit i është bashkangjitur dhe një kallëzim i madh penal e sqaron mjaft mirë skemën se si qeveria Rama ka angazhuar gjithë resurset qeveritare për vjedhjen e shekullit me vlerë 430 mln euro. Çdo ditë që kalon buxheti i shtetit i paguan 90 mijë euro/ditë inceneratorit ndërkohë që vendi është në një krizë të thellë ekonomike dhe jo vetëm. Koha që drejtësia të veprojë pasi Shqipëria luftën kundër korrupsionit, pastrimit të parave dhe krimit të organizuar duhet ta ketë prioritet. Koha që SPAK mos të trembet nga sulmet politike!”, përfundon Tabaku.
Discussion about this post