Kryetarja e LSI-së Monika Kryemadhi ka folur sërish sot mbi aferën e inceneratorëve duke u shprehur se Lefter Koka është hallka e fundit e zinxhirit kriminal.
Në një intervistë për mediat, Kryemadhi tregon se si erdhën informacionet në LSI, duke shtuar se bëhet fjalë për një skemë korruptive që shkon nga kryeministri dhe përfundon tek nëpunësi më i thjeshtë në komisionin e ofertave.
“Nuk duhet të kapemi pas emrave, por pas fenomenit. Katarsisi është fenomen i domosdoshëm, edhe në partitë politike. Skema e inceneratorëve, jo vetëm është korruptive, por kalon edhe çështjen shqiptare, sepse ndjekja e parave shkon jashtë kufijve. Ish-përfaqësuesi i LSI është hallka e fundit i këtij zinxhiri korruptues, kriminal, sepse në këndvështrimin tonë kemi të bëjmë me një grup të strukturuar kriminal, sepse vetë funksionimi i shtetit shqiptar, me vendime të marra brenda një dite, dhe devijimin e koncesioneve, gjithçka ishte në funksion të një skeme shumë të madhe. Shqipëria noton në korrupsion, por skema e inceneratoreve shkon përtej” – tha Kryemadhi.
Kryemadhi shprehet se afera korruptive shkon nga kryeministri dhe përfundon tek nëpunësi më i thjeshtë në komisionin e ofertave, ku përtej korrupsionit sipas saj kemi të bëjmë edhe me pastrim parash.
“Çështja nuk ka të bëj vetëm me garën sesi u blenë makineritë, por me shkelje ligjore të hapura që dëshmon ekzistencën e një grupi kriminal, që dërgoi 430 milionë euro në shoqëri offshorë në Holandë, që pastaj investohen këtu në ndërtime e të tjera, pa pasur dijeni për origjinën” – u shpreh Kryemadhi.
Discussion about this post