Kreu i Grupit Parlamentar të PS-së, Bledi Çuçi, bëri këtë të mërkurë avokatinë e kryebashkiakut të Tiranës, Erion Veliaj, i cili është nën hetim dhe i janë arrestuar disa drejtorë e zyrtarë për aferën e inceneratorit të Tiranës dhe dosjen “5D”.
Në një dalje për mediat, Çuçi shprehu mbështetje për kryebashkiakun e Tiranës.
“Erion Veliaj është kryetari i bashkisë më i suksesshëm që ka pasur Tirana dhe PS në këto vite. Transformimi historik i Tiranës është një realitet që nuk mund ta bëjë pis asnjëlloj balte që mund të hidhet mbi figurën e kryetarit. Ne jemi të nderuar që kemi zgjedhur nga gjiri ynë apo nga pjesa jonë një kryetar bashkie që nderon jo vetëm Tiranën po përtej Shqipërisë, çdo socialist apo çdo tirons, me vepra dhe jo me fjalë. Çështjet e tjera janë çështje që lidhen me sektorët ligjzbatues. Grupi i PS i jep mbështetjen absolute Veliajt”, u shpreh ai.
I pyetur nëse Veliaj është edhe më i suksesshëm se kryeministri Edi Rama, i cili ka qenë gjithashtu kryebashkiak, Çuçi tha: “Jo në këto vite thashë… që kur qeverisim së bashku dhe në nivel qendror dhe lokal”.
Gjithashtu, ai u pyet nga gazetarët nëse e nderon arrestimi i drejtorëve të Verliajt, pas mburrjes që bëri për këtë të fundit.
“Nuk na nderon arrestimi i drejtorëve, por duhet të presim të mos nxitohemi të presim fjalën e fundit të drejtësisë”, tha Çuçi.
Discussion about this post