Ndonëse kanë kaluar 32 vite, nuk ka ende drejtësi për masakrën e Peshkëpisë së 10 prillit 1994, kur nga sulmi terrorist ndaj një reparti kufitar pranë fshatit Peshkëpi të Dropullit, katër kilometra brenda kufirit shqiptar me Greqinë, mbetën të vrarë dy ushtarakë shqiptarë, Fatmir Shehu dhe Arsen Gjini, si dhe u plagosën tre të tjerë.
“Drejtësi për masakrën” ishte thirrja kryesore e një grupi aktivistësh edhe në këtë 32-vjetor, që u përkujtua në qytete të ndryshme të vendit, nga Tirana në Himarë, ku u vendosën banderola me mesazhe për zbardhjen e masakrës.
“Drejtësi për Peshkëpinë, Alfred Beleri i akuzuar”! Është mesazhi kryesor i protestuesve, të cilët 32 vite pas sulmit kërkojnë që të dalë para drejtësisë edhe Fredi Beleri, i hetuar nga autoritetet shqiptare për ngjarjen, por që çështja ndaj tij është mbyllur për mungesë provash, ndërsa tashmë ai është eurodeputet i Greqisë në Parlamentin Europian.
Një banderolë rreth 10 metra është vendosur në sheshin “Nënë Tereza”, në Tiranë, një tjetër para rrugës së ambasadave në kryeqytet, si dhe në zona të ndryshme të Himarës.
Protesta është organizuar nga grupe atdhetare, të cilët janë shprehur se nuk do të tërhiqen së kërkuar drejtësi për masakrën e Peshkëpisë.
Sulmi ndodhi në orët e para të mëngjesit të 10 prillit 1994, kur një grup nacionalist grek hyri i armatosur dhe me maska në repartin shqiptar, ku qëlloi mbi ushtarët shqiptarë, duke vrarë dy prej tyre, dhe më pas rrëmbeu edhe armët luftarake që ishin në depon e repartit.
Ngjarja e rëndë është hetuar nga autoritetet e të dyja vendeve, greke dhe shqiptare, por pa shpallur fajtorë.
gijotina.com/
Discussion about this post