Agjenti i Lautaro Martinez, Alejandro Camano këmbëngul se sulmuesi nuk do të largohet nga Interi, pavarësisht ofertave nga klubet angleze, dhe javën e ardhshme do ketë takime për rinovimin e kontratës.
Ylli argjentinas në mënyrë të përsëritur është diskutuar për një kalim te Arsenali dhe Tottenham Hotspur, gjithashtu edhe te Atletico Madridin, me ofertat që raportohet të kapin shifrat e 70 milionë euro.
Pas shitjes së Romelu Lukakut te Chelsea për 115 milionë euro, zikaltërit janë të vendosur të mos humbasin edhe sulmuesin e tjetër të mbetur.
“Nga sot, ai nuk po largohet nga Interi, pavarësisht ofertave nga Premier Liga”, ka thënë fillimisht agjenti i lojtarit.
“Ai është i lumtur aty dhe e do klubin. Ne do të takohemi javën e ardhshme për të diskutuar rinovimin e kontratës. Synimet tona janë të qarta, por gjithashtu varet edhe nga dëshira e klubit”, përfundoi agjenti i Lautaros.
Kontrata aktuale e Lautaros është e vlefshme deri në qershor 2023 dhe agjenti i tij deri më tani nuk ka pasur absolutisht asnjë nxitim për të negociuar një zgjatje, duke ngritur pikëpyetje mbi të ardhmen e tij.
