Zëvendës kryeministri Arben Ahmetaj sëbashku me ministren e Financave Delina Ibrahimaj ka dalë në një konferencë të përbashkët për të bërë bilancin e rimëkëmbjes ekonomike.
Ahmetaj deklaroi se në tremujorin e dytë të vitit 2021 ekonomia në vendin tonë është rritur thuajse me 18% në krahasim me të njëjtën periudhë të vitit që lamë pas.
“Në tremujorin e dytë të vitit 2021 produkti i brendshëm bruto, ekonomia u rrit me 17.89% krahasuar me tremujorin e dytë të vitit 2020. Një vit më parë në tremujorin e dytë ekonomia pësoi një rënie drastike të krahasuar me atë të vitit 1997. Janë 3200 kantiere të rindërtimit dhe ka një transformim të zonave të dëmtuara nga tërmeti. Te konsumi familjar ndihet ringritja. Për shkak të elementëve që kanë të bëjnë me menaxhimin e pandemisë dhe tërmetit po japin efekte pozitive. Konsumi në familje është rritur me 10%”.
Ahmetaj teksa renditi sipas tij, arritjet në fushën e ekonomisë, tha se qeveria ndër të tjera dyfishoi ndihmën ekonomike dhe ka rimbursuar barnat e personave të infektuar me Covid.
“Këto nuk janë më shenja por trende të rëndësishme të shërimit ekonomik falë një menaxhimi të kujdesshëm pas pandemisë dhe tërmetit. Në vitin 2020 dhe 2021 dyfishuam dhe pagesën e papunësisë, falëm kamatvonesat për mbi 210 mijë konsumatorë. E dyfishuam ndihmën ekonomike dhe pagesën e papunësisë, garantuam rimbursimin e barnave për virusin. Ndërhyrja që bëmë në ekonomi u shpërblye”.
Por sipas raporteve të shumta nga agjensi të pavaruara, shpenzimet mesatare nga xhepi për pacient ishin 1000 $, ndërsa qeveria nuk ka rimbursuar as 1% të vlerës së harxhuar. Shqiptarët kanë shpenzuar 30 mln euro për ilaçe dhe mjekime gjatë pandemisë, ndërsa qeveria i ka rimbursuar qytetarëve veç 231 mijë euro.
