Makina del nga rruga në Kapshticë, humb jetën 31-vjeçari dhe plagoset pasagjeri

Një aksident i rëndë ka ndodhur pasditen e sotme në Kapshticë, ku një makinë ka dalë nga rruga në afërsi të kthesës së Gosës. Ngjarja ka ndodhur rreth orës 16:50, në aksin rrugor Bilisht-Kapshticë, në afërsi të fshatit Kapshticë, Devoll, ku si pasojë ka humbur jetën 31-vjeçari Arjan Shtika, banues në fshatin Hoçisht, Devoll.

Gjithashtu është dëmtuar pasagjeri me inicialet A. B., i cili ndodhet në Spitalin e Bilishtit jashtë rrezikut për jetën.

I riu ka qenë duke drejtuar mjetin tip “Hyundai”, ku dyshohet se ka humbur kontrollin e mjetit dhe ka dalë nga rruga.

Grupi hetimor po punon për sqarimin e rrethanave dhe përcaktimin e shkaqeve të daljes nga rruga të automjetit.