Në orët e para të ditës së sotme, një aksident me pasojë vdekjen ka ndodhur në aksin rrugor Pogradec – Qafë Thanë. Ngjarja e rëndë ka ndodhur në afërsi të fshatit Mëmëlisht kur drejtuesi i një mjeti tip “Mercedes Benz” që po udhëtonte nga Qafë Thana në drejtim të Pogradecit ka humbur kontrollin duke kaluar në korsinë e kundërt të rrugës nacionale dhe për pasojë është përplasur me një mjet “Citroen” me targa greke.
Përplasja ka qenë e fortë dhe për pasojë ka shkaktuar vdekjen e 80 vjeçarit Fillim Zeka, i ndodhur në sediljen e parë të pasagjerit si dhe plagosjen e drejtuesit të mjetit “Citroen”.
Për policinë, drejtuesi i mjetit tip “Benz” dyshohet se ka humbur kontrollin edhe nga pagjumësia në kushte kur ka qenë duke lëvizur me shpejtësi tej normave të lejuara duke mos i krijuar mundësi manovrimi për shmangien e përplasjes drejtuesit të mjetit tjetër.
Policia ka shoqëruar në komisariatin e Pogradecit drejtuesin e mjetit tip “Benz”, Dritan Yzellari, për të sqaruar më tej rrethanat e këtij aksidenti të rëndë.
“Rreth orës 04:50, në aksin rrugor ‘Pogradec-Qafë Thanë’, pranë fshatit Memëlisht, automjeti tip ‘Benz’ me drejtues shtetasin D. Y., 46 vjeç, është përplasur me automjetin tip “Citroen” me drejtues shtetasin Y. M., 58 vjeç. Për pasojë janë dëmtuar drejtuesi i automjetit tip ‘Citroen’ 58-vjeçari Y. M., i cili ndodhet jashtë rrezikut për jetën dhe shtetasi F. Z., 80 vjeç, banues në fshatin Çetë, Devoll, pasagjer në këtë automjet, i cili për pasojë ndërroi jetë. Shkaku paraprak i aksidentit dyshohet se ka qenë kalimi në korsinë tjetër të rrugës, duke mos mbajtur krahun e duhur të lëvizjes, nga ana e drejtuesit të automjetit tip “Benz” shtetasit D.Y.“, njoftoi policia.
Discussion about this post