Aksident tragjik në Greqi, humb jetën i riu shqiptar

Një aksident i rëndë ka ndodhur ditën e djeshme në në aksin rrugor Kastel-Platanos, në fshatin Traqila.

Një makinë me turistë është përplasur me një motor, ku po udhëtonin dy vëllezër shqiptarë.

Si pasojë Dionis Qoshku, 17 vjeç humbi jetën, ndërsa vëllai i tij është dërguar në Spitalin e Haniasë ku iu nënshtrua një ndërhyrje kirurgjikale dhe fatmirësisht ndodhet jashtë rrezikut për jetën.

Lajmi është bërë i ditur nga Shoqata shqiptare Kisamo ”Kastel”.

“Një tragjedi e rëndë ka ndodhur sot në Kastel, në aksin rrugor Kastel Platanos, në fshatin Traqila rreth orës 9:30 të mëngjesit , një makinë turistësh ka bërë një kthesë të menjëhershme dhe si pasojë dy djemtë nga Librazhdi që ishin në motorr nga pas u përplasën me automjetin duke gjetur vdekjen 17 vjeçari Dionis Qoshku dhe vëllai i tij Ersid Qoshku , i cili gjendet në Spitalin e Haniasë ku bëri ndërhyrje kirurgjikale dhe është jashtë rrezikut për jetën.

Është nga ngjarjet më të dhimbshme dhe i ka shokuar të gjithë njerzit vëndas dhe të huaj ,të mëdhenj e të vegjël , miq dhe shokë të familjes, bashkëmoshatarët e tij, të cilët nuk do donin të besonin se Dionisi nuk jeton më , kjo ngjarje është nga më të dhimbshmet që të shterojnë fjalët, dhimbja dhe pikëllimi nuk kanë të përshkruar.

I shprehim ngushëllimet më të sinqerta familjes , zoti u dhëntë kurajo për të përballuar këtë dhimbje të madhe. I përjetshëm kujtimi yt Dionis“-shkruhet në faqen e shoqatës.

Mediat greke flasin për një ditë zie në Kissamos, pas lajmit për vdekjen e një fëmije të vogël, vetëm 17 vjeç, pas një aksidenti trafiku të ndodhur në fshatin Trachilas mëngjesin e së hënës

“Dionisi është një tjetër viktimë e rrugës, i cili humbi jetën kur motoçikleta me të cilën udhëtonte u përplas me një makinë teksa po merrte kthesën.

I riu u dërgua në spitalin e Chanias me dëmtime të rënda në tru, por ai dha frymën e fundit, pavarësisht përpjekjeve të mjekëve për ta mbajtur në jetë.

Edhe vëllai i tij 14-vjeçar ndodhet i shtruar në spitalin e Chanias me këmbë dhe duar të thyera.

Vdekja e tij shkaktoi trishtim në fshatin ku jetonte, ndërsa të shumtë ishin ata që i dhanë lamtumirën e fundit përmes rrjeteve sociale duke vendosur edhe lule në vendin ku humbi jetën”, shkruan Cretalive.news