Aksident tragjik në Sarandë, ndërron jetë ish-kryetari i komunës Livadhja

Irodhis Dalani, 61 vjeç ka ndërruar jetë pas një aksidenti të ndodhur në orët e para të mëngjesit të sotëm në aksin rrugor Sarandë-Delvinë.

Dalani është përplasur nga një automjet tjetër rreth orës 04:00 të mëngjesit dhe për pasojë ka mbetur i plagosur rëndë.

Ai ka marrë ndihmën e parë mjekësore në spitalin e Sarandës dhe më pas është transportuar me urgjencë drejt spitalit të Janinës por nuk ka mundur t’i mbijetojë plagëve duke ndërruar jetë.

Policia tashmë ka nisur hetimet për të zbuluar shkaqet e kësaj ngjarje të rëndë. Dalani ka mbajtur postin e kryetarit të komunës së Livadhjës ndërsa së fundmi ushtronte veprimtarinë e prodhimit të djathit.

Në momentin e aksidentit ai kishte dalë herët në mëngjes për të mbledhur qumëshin nga fermerët e zonës. Lidhur me ngjarjen ka dhënë shpjegime edhe policia.

Njoftimi

Mëngjesin e sotëm, në vendin e quajtur “Ura e Gajtarit”, në Delvinë, automjeti tip “Benz” me drejtues shtetasin I. D., 61 vjeç, banues së Sarandë, është përplasur me automjetin tip “Volkswagen”, me drejtues shtetasin N. B., 26 vjeç, banues në Delvinë.

Si pasojë e aksidentit janë dëmtuar të dy drejtuesit e automjeteve, të cilët janë dërguar në spitalin e Sarandës, për të marrë mjekim.

Disa orë pas aksidentit, shtetasi I. D. ka humbur jetën gjatë kohës që po transportohej në Greqi, për mjekim më të specializuar.

Në vijim të veprimeve procedurale, është arrestuar në flagrancë drejtuesi i automjetit tjetër, shtetasi N. B.

Grupi hetimor vijon punën per sqarimin e rrethanave të aksidentit.