Është zbardhur identiteti i 25-vjeçarit shqiptar, i cili humbi jetën në një aksident tragjik të regjistruar paraditen e djeshme në Itali.
Mediat përtej Adriatikut raportojnë se viktima është kamionisti Haris Shala, baba i një vajze të vogël, me banim në Pisa. Nuk kishin kaluar as një mijë ditë para se të binte një zi e re në familjen Shala, pasi Haris në tetor të vitit 2021 kishte humbur po në aksident rrugor, kushëririn e tij, Besmirin.
Aksidenti ndodhi ditën e djeshme rreth orës 10:15 në autostradën A22 Brennero në karrexhatën jugore.
Autostrada ishte mbyllur më herët që nga ora 06:20 deri në orën 08:22 për të lëvizur një rimorkio që ishte përmbysur në rrugë. Më pas autostrada u rihap në një korsi për të lejuar që të lirohej sadopak trafiku, përpara një mbylljeje pasuese në orën 09:40 të mëngjesit, e nevojshme për të hequr rimorkio. Pak minuta më vonë ka ndodhur dhe aksidenti i dytë, edhe më tragjik, ku ka humbur jetën 25-vjeçari shqiptar
Përplasja ka ndodhur mes dy kamionëve që po udhëtonin të dyja në drejtim të Modenës. I tradhtuar nga shiu dhe fushëpamja e dobët, viktima Haris Shaladyshohet se nuk ka vërejtur mjetet e ndalura në kolonë dhe ka goditur makinën e fundit të rreshtit. Pas përplasjes së fuqishme, shoferi shqiptar me banim në Piza, vdiq brenda kabinës së kamionit, e cila u rrudhos nga përplasja.
Në vendngjarje kanë mbërritur një ambulancë, një helikopter, policia rrugore dhe zjarrfikëset. Gjatë operacioneve të shpëtimit – të cilat përfunduan rreth mesditës – autostrada mbeti e mbyllyr. Zjarrfikësit, të cilët mbërritën nga Verona me dy automjete, duke përfshirë vinçin dhe shtatë operatorë, përdorën gërshërë hidraulike për të nxjerrë trupin e Harisit nga kabina e kamionit. Megjithatë, për fat të keq, pavarësisht ndihmës, nuk mund të bëhej asgjë. Shiptari humbi jetën. Aksidenti shkaktoi të paktën 8 kilometra bllokim trafiku.
Haris Shala ishte i njohur në qytet. Prej disa kohësh ai punonte si shofer kamioni, madje kalonte disa ditë jashtë qytetit. I pëlqente të luante futboll. “Ai ishte një djalë i mirë, por edhe shumë i përgjegjshëm – e kujton Marco, një shok shkolle -. Një person i integruar dhe i pëlqyer. Na vjen vërtet shumë keq. Ky lajm na ka tronditur”.
Herta, kushërira e Harisit, është e dëshpëruar: “Nuk ka fjalë – thotë ajo e pushtuar nga lotët – dhimbja në këtë moment është vërtet shumë e madhe”.
Familja Shala ishte goditur tashmë nga një tjetër humbje shumë e rëndë më 17 tetor 2021. Besmiri, 29 vjeç, punëtor magazine, kishte vdekur pasi ishte rrëzuar nga skuteri i tij në rrethrrotullimin midis Pizës dhe San Xhulianos. 918 ditë pas asaj humbjeje të tmerrshme, një tjetër tragjedi për familjen.
Discussion about this post