Një aksident tragjik ka ndodhur mbrëmjen e djeshme në aksin rrugor “Qafë Mali–Fierzë”, ku ka humbur jetën 51-vjeçari Prendush Kola, punonjës i mirëmbajtjes së rrugës.
Ngjarja ndodhi në vendin e quajtur “Shkëmbi i Dardhës”, kur mjeti që ai drejtonte doli nga rruga dhe përfundoi në humnerë. Pas dëgjimit të zhurmës, banorët e zonës nisën kërkimet dhe rreth orës 22:00 gjetën Kolën të gjallë, por të plagosur rëndë.
Sipas raportimeve në media, në momentet e fundit ai u ka kërkuar falje banorëve që i kishte shqetësuar në atë orë të mbrëmjes. Pavarësisht përpjekjeve për ndihmë, 51-vjeçari ndërroi jetë si pasojë e plagëve të shumta.
“Mbrëmjen e djeshme, në aksin rrugor ‘Qafë Mali–Fierzë’, shtetasi P. U., 51 vjeç, duke drejtuar automjetin e tij, dyshohet se ka humbur kontrollin mbi drejtimin e automjetit, i cili ka dalë nga rruga dhe ka rënë në një humnerë.
Menjëherë pas marrjes së njoftimit, në vendngjarje kanë shkuar shërbimet e Policisë, forcat zjarrfikëse dhe ambulanca, por shtetasi ka humbur jetën si pasojë e plagëve të marra.”, njofton policia.
Discussion about this post