Aksidentoi dhe kërcënoi një grua, arrestohet 51-vjeçari në Elbasan

Një person ka rënë në prangat e policisë së Elbasanit, ndërsa dy të tjerë janë proceduar penalisht për vepra të ndryshme penale.

Mësohet se, është arrestuar një 51-vjeçar pasi akuzohej për veprat penale “Shkelja e rregullave të qarkullimit rrugor”, “Drejtimi i automjeteve në mënyrë të parregullt” dhe “Kanosja”. Ky person, duke drejtuar mjetin në gjendje të dehur, është përplasur me një mjet tjetër që drejtohej nga një 34-vjeçare, duke shkaktuar vetëm dëme materiale, dhe pas përplasjes së mjeteve e ka kërcënuar këtë të fundit.

Gjithashtu, janë proceduar në gjendje të lirë, për veprën penale “Prerja e paligjshme e pyjeve”, një 48- vjeçar, banues në Elbasan dhe një 37-vjeçar, banues në Gramsh, pasi u konstatuan duke transportuar me një mjet tip kamionçinë, dru të prera në mënyrë të paligjshme.

Gjithashtu, është arrestuar një 35-vjeçar, banues në Gramsh, i shpallur në kërkim policor nga Komisariati i Policisë Nr. 6 Tiranë, për veprën penale “Dhuna në familje”.