Gent Progni denoncon incidentin në protestën para Parlamentit: Polici civil nxori thikën dhe tentoi të më godiste!

Aktivisti dhe eksperti i IT-së Gent Progni ka folur mbi incidentin ku është përfshirë ditën e sotme, ku sipas tij një polic civil, ka tentuar ta godasë me thikë gjatë tubimit që mbajt para Kuvendit.

Ai shtoi se, sipas tij, po ushtrohet presion edhe ndaj bizneseve që mund të kenë regjistruar pamje të incidentit.

“Sot, një polic civil, Edison Duda, oficer pranë Drejtorisë së Policisë, më tha: ‘Pse po filmon?’. Nxori thikën dhe tentoi të më godiste. Po mundohen të fshijnë pamjet e argjendarive që kanë filmuar të gjithë skenën. U kanë shkuar dhe u bëjnë presion që të mos dorëzojnë pamjet”, tha ai.

Sipas Prognit, situata ka kaluar “vijën e kuqe” dhe protestuesit nuk do të tërhiqen deri kur ky sistem të marrë fund, derisa të zhduken të korruptuarit dhe derisa Edi Rama të japë dorëheqjen.

Aktivisti dhe eksperti i IT-së Gent Progni: E nisën dhunën në Zvërnec, e kaluan në Tiranë. U dhunuam nga Shqiponjat, bodyguardët e Ulsiut. Na fshinë kamerat, i manipuluan provat, akoma nuk i kanë publikuar pamjet. Sot, një polic civil, Edison Duda, oficer pranë Drejtorisë së Policisë, më tha: ‘Pse po filmon?’. Nxori thikën dhe tentoi të më godiste.

Po mundohen të fshijnë pamjet e argjendarive që kanë filmuar të gjithë skenën. U kanë shkuar dhe u bëjnë presion që të mos dorëzojnë pamjet. Shkova, i takova të gjithë ata pronarët e argjendarive, të gjithë po dridheshin. ‘Kemi halle, kemi halle’. Por dhe sa do të durojmë me këto halle? Dhe sa do të durojmë e do të ulim hundën për këto halle?

Vija e kuqe është kaluar, nuk durojmë dot më. Jua kemi thënë, ne nuk trembemi nga plumbi e jo më nga thikat. Do të jemi këtu në shesh dhe do të jemi atje me vezë. Nuk trembemi nga mijëra forca policie dhe nga asnjë skenar dhune që ata përgatisin.

Jemi aty për familjet tona, jo për poste apo për të ngritur mirëqenien aktuale, por që ky sistem të marrë fund. Do të jemi këtu derisa të zhdukim të korruptuarit dhe derisa Edi Rama të japë dorëheqjen.

Nëse kanë menduar se na kanë trembur, ja ku jemi dhe më shumë. Na thonë: “Pse denoncon?”. Ne do të bëjmë çdo gjë ligjore dhe institucionale që të tregojmë që jeni plehra të korruptuar. Çdo mundësi që do të bëjnë për të fshehur provat, do t’ua faktojmë çdo ditë.