Nga protesta e 61-të para Kryeministrisë, aktivisti Edison Lika deklaroi se lëvizja qytetare ka hyrë në muajin e tretë të saj, duke theksuar se qëllimi mbetet dorëheqja e kryeministrit Edi Rama dhe e qeverisë.
Sipas Likës, deklaratat e përsëritura të Ramës se nuk do të japë dorëheqjen tregojnë se kreu i qeverisë ndodhet nën presion.
Ai pretendoi se kryeministri është i shqetësuar për situatën brenda Partisë Socialiste.
“Sa më shpesh thotë se nuk do të japë dorëheqjen, aq më shumë tregon se i ka hyrë frika. Sot është detyruar të mbledhë partinë e tij, e cila po shpërbëhet”, u shpreh aktivisti.
Lika shtoi se, sipas tij, Partia Socialiste është kthyer në një strukturë që nuk mund të menaxhohet më dhe se ka nisur “numërimi mbrapsht” për mazhorancën.
Ai reagoi edhe ndaj kritikave të mëparshme se protestat do ta fusnin vendin në konflikt, duke deklaruar se, sipas tij, lëvizja nuk ka krijuar përçarje në Shqipëri, por ka vënë përballë njëra-tjetrës strukturat e Partisë Socialiste.
Protestat para Kryeministrisë vijojnë prej 61 ditësh radhazi, ndërsa organizatorët kanë bërë të ditur se do të vazhdojnë mobilizimin edhe në javët në vijim.
Discussion about this post