Asnjë kontakt me Baki Goxhajn pas ndalimit të anijes humanitare për Gazën, Ministria e Jashtme hesht

Fati i aktivistit shqiptar Baki Goxhaj, i cili ishte pjesë e flotiljes humanitare “Sumud” që ishte nisur drejt Gazës për të dërguar ndihma humanitare, po që u ndalua nga ushtria izraelite në ujërat ndërkombëtare, është ende i paditur.

Nga ana e Ministrisë së Jashtme të Shqipërisë, apo e Ambasadës shqiptare në Izrael, nuk ka ende një reagim apo informacion për vendndodhjen apo gjendjen e tij shëndetësore.

Bashkëshortja e tij Eriselda Balliu, tha dy ditë më parë se kishte komunikuar me Ambasadën shqiptare në Izrael si dhe me Ministrinë e Jashtme në vend, por askush nuk e ka vënë në dijeni për vendndodhjen e bashkëshortit të saj.

Pamjet e publikuara nga ministri izraelit i Sigurisë Kombëtare, Itamar Ben-Gvir, ku shfaqen aktivistët e Global Sumud Flotilla të gjunjëzuar dhe me duart e lidhura, kanë shkaktuar reagime të forta ndërkombëtare.

Franca, Holanda, Belgjika, Spanja dhe Kanadaja kanë thirrur ambasadorët izraelitë për të kërkuar shpjegime lidhur me trajtimin e aktivistëve.

Ministri i Jashtëm francez, Jean-Noël Barrot, e dënoi videon duke shprehur indinjatë për mënyrën e trajtimit të të ndaluarve.

Nga Holanda, ministri i Jashtëm Tom Berendsen i cilësoi pamjet “tronditëse dhe të papranueshme”, duke theksuar se shkelet dinjiteti njerëzor.

Edhe Belgjika reagoi ashpër, ndërsa ministri Maxime Prévot deklaroi se mes të arrestuarve ndodhen edhe shtetas belgë.

Ministrja britanike Yvette Cooper u shpreh “vërtet e tronditur”, duke kërkuar sqarime nga autoritetet izraelite për trajtimin e aktivistëve.

Ambasadori gjerman në Izrael, Steffen Seibert, e cilësoi trajtimin ndaj të ndaluarve “krejtësisht të papranueshëm”.

Ministri i Jashtëm spanjoll, José Manuel Albares, e quajti videon “monstruoze, çnjerëzore dhe të turpshme”, duke kërkuar edhe falje publike nga Izraeli.

Edhe Irlanda reagoi me tone të forta, ndërsa ministrja Helen McEntee kërkoi lirimin e menjëhershëm të shtetasve irlandezë të ndaluar.

Kanadaja iu bashkua reagimeve ndërkombëtare, me ministren Anita Anand që deklaroi se trajtimi i civilëve duhet marrë “shumë seriozisht” dhe kërkon veprim urgjent.

gijotina.com/