Ish-Kryeministri Sali Berisha ka thirrur një mbledhje të Kryesisë së PD-së që drejton. Mbledhja do të mbahet ditën e martë në selinë e PD-së, ndërsa ajo vjen në një kohë kur SPAK ka ngritur akuzën për korrupsion pasiv ndaj ish-Kryeministrit dhe po e heton atë lidhur me çështjen e njohur si privatizimi i kompleksit Partizani.
Në mbledhjen e Kryesisë pritet të merren vendime lidhur me aksionin opozitar, pasi më herët në deklarata publike, Berisha është shprehur se akuzat që janë ngritur mbi të dhe dhëndrin e tij, Jamarbër Malltezi, e bëjnë më të fortë dhe nuk do të stepin opozitën.
Mbledhja do të zhvillohet në mesditë, ndërsa duket se ajo do të zëvendësojë mbledhjet e përjavshme të Grupit Parlamentar, veçanërisht pas atij që u konsiderua si një bashkim mes deputetëve mbështetës të Sali Berishës dhe atyre që i përkasin grupimit të kryesuar nga Gazment Bardhi.
Pritet që Kryesia e PD-së të dalë me një qëndrim përsa i takon zhvillimeve të fundit, por edhe asaj që pritet të ndërmarrë opozita e drejtuar nga Berisha.
Discussion about this post