Akuza për Investimet Strategjike, nesër vendoset për mandatin e Xhaçkës

Nesër mblidhet Këshilli për Rregulloren, Mandatet dhe Imunitetin për shqyrtimin e mandatit të deputetes, njëkohësisht ministres Olta Xhaçka.

Kjo është mbledhja e dytë pas mocionit të bërë nga deputetët e PD-së të cilët akuzojnë se bashkëshorti i Olta Xhaçkës, ka përfituar kundër ligjit, statusin e investitorit strategjik.

Sipas demokratëve, ministrja Xhaçka është e përfshirë në këtë proces, ndaj asaj duhet t’i hiqet mandati i deputetes.

Njoftimi i Kuvendit:

Nesër, ditën e premte, datë 01.07.2022, ora 12:00, nën drejtimin e Kryetares së Kuvendit, znj. Lindita Nikolla, njëherësh Kryetare e Këshillit për Rregulloren, Mandatet dhe Imunitetin, do të zhvillohet mbledhja e këtij Këshilli, në Kryesinë e Kuvendit, salla “Pjetër Arbnori”, me këtë rend dite:

Vijimi i mbledhjes për mocionin e 1/10 të deputetëve përfaqësues të Grupit Parlamentar të Partisë Demokratike për ndjekjen e procedurës parlamentare për konstatimin e pavlefshmërisë dhe mbarimit te mandatit të deputetes Olta Xhaçka.

(Urdhër nr. 59, datë 30.06.2022, i Kryetares së Kuvendit, znj. Lindita Nikolla).

Mbledhja do të transmetohet live në faqen WEB dhe FB të Kuvendit. Operatorët mund të ndjekin fillimin e mbledhjes për plane, ndërsa gazetarët mund të ndjekin mbledhjen gjatë gjithë kohës. Duke ju falenderuar për mirëkuptimin, mund të më shkruani për çdo nevojë për mbështetje apo sqarim. Faleminderit!

Në diskutimet e bëra gjatë mbledhjes së parë, PD thotë se do t’i drejtohet me 28 firma GJykatës Kushtetuese nëse nuk merret një vendim i drejtë sipas tyre.