Gjykata e Apelit ka lënë në burg Artur Ballën dhe Bledar Lilon, të cilët janë kunati dhe ish-truproja e biznesmenit, Rezart Taçi, pasi akuzohen për pastrim parash.
Dyshohet se Balla dhe Lilo kanë bashkëpunuar me dy italianë, Francesco Zummo dhe Fabio Petruzzella, si edhe 1 zviceran në skemën e pastrimit të parave, ndërsa i përfshirë në skemë është edhe biznesmeni Rezart Taçi, aktualisht në kërkim.
Dosja e anti-mafies Italiane zbuloi rolin e ish-bosit të naftës Rezart Taçi në transferimin e mbi 18 milionë eurove të një sipërmarrësi italian të hetuar për lidhje me “Cosa Nostra”-n, Francesco Zummo. Për shumën që do të kalonte nga Zvicra në Shqipëri dhe më pas në Singapor ose Hong Kong, Taçi do të merrte pjesën e tij mbi 3 milionë euro si “komision” për ndihmën. Sapo transferta nga banka zvicerane të mbërrinte në Shqipëri, nëpërmjet Petruzzella-s, do t’i duhej ta transferonte në një kompani në Singapor ose Hong Kong.
Prokuroria italiane e antimafias ka marrë në pyetje Francesco Zummon dhe Fabio Petruzzella, ku Zummo nuk ka pranuar t’i përgjigjet asnjë pyetjeje.
Prokurorët italianë akuzojnë financierin Fabio Petruzzella, se ka kryer dhe operacione të tjera për të lëvizur paratë e sipërmarrësit në shërbim të mafias siciliane përmes përvetësimeve fiktive të pasurisë, që më pas do t’i rikthehej përsëri Francesco Zummos.
Discussion about this post