Kundërshtari rus Alexei Navalny, i cili ndodhet prej më shumë se dy vjetësh në burg, ka deklaruar se kundër tij është hapur një hetim i ri me akuzat për “terrorizëm”, përveç atij ekzistues për “ekstremizëm”.
“Hetuesit më kanë thënë se një çështje e re është hapur veçmas kundër meje dhe se unë do të gjykohem nga një gjykatë ushtarake”, tha Navalny.
Opozitari rus, i cili ndodhet në burg që nga janari 2021, po vuan një dënim me 9 vjet burg për mashtrim dhe përbuzje të gjykatës, të cilin mbështetësit e tij e gjykojnë si të motivuar politikisht.
Ai është akuzuar edhe me dhjetë persona të tjerë për krime të ekstremizmit, nxitje të terrorizmit. Sot në mëngjes, Gjykata e Qarkut Basmanny të Moskës u mblodh me dyer të mbyllura për një seancë dëgjimore për të shqyrtuar disa aspekte procedurale.
Navalny, i cili po merr pjesë në seancë me videokonferencë, tha se rrezikonte një dënim deri në 30 vjet për akuzat kundër tij.
“Për më tepër hetuesit më thanë se një çështje për terrorizëm është hapur veçmas. Do të thotë, sa jam në burg do të kryeja akte terrorizmi. Dhe çështja do të shqyrtohet nga një gjykatë ushtarake. Pra jam nën kanosje me burgim të përjetshëm”, theksoi ai.
Discussion about this post