Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka dërguar për gjykim shtetasin S.M., i akuzuar për veprën penale “Shfrytëzim prostitucioni”, si dhe shtetasen braziliane L.J.D.S., e akuzuar për “Prostitucion”.
Sipas organit të akuzës, hetimet nisën pas një informacioni të përcjellë nga Ambasada e Brazilit në Tiranë, e cila kërkoi ndihmë për gjetjen e një shtetaseje braziliane, me të cilën familjarët kishin humbur kontaktet prej rreth një muaji.
Nga veprimet hetimore, rezultoi se shtetasja braziliane kishte hyrë në Shqipëri në shtator të vitit 2025 me qëllim ushtrimin e prostitucionit, pas kontakteve të krijuara përmes platformave të komunikimit në internet.
Sipas Prokurorisë, ajo ka ushtruar prostitucion në ambiente të ndryshme në Tiranë, Golem dhe më pas në Lushnjë. Ndërkohë, i pandehuri S.M. dyshohet se ka luajtur një rol aktiv në shfrytëzimin e saj, duke i siguruar klientë kundrejt pagesës, negociuar tarifat e shërbimeve seksuale dhe përfituar financiarisht nga kjo veprimtari.
Hetimet kanë zbuluar gjithashtu se, përmes komunikimeve elektronike, S.M. u ofronte personave të ndryshëm mundësinë për të kryer marrëdhënie seksuale me shtetasen braziliane kundrejt pagesës, duke organizuar takimet dhe përcaktuar çmimet.
Në vijim të operacionit, shtetasja braziliane u gjet nga Policia Gjyqësore në një banesë në fshatin Karbunarë, në Bashkinë e Lushnjës.
Discussion about this post