Kryeministri Edi Rama ka reaguar sërish pas akuzave të opozitës lidhur me udhëtimet e tij me avion charter, pasi të dhënat u bënë publike nga hakerat iranianë. Në një postim në Twitter, Rama thotë se ndjen neveri “për rublaxhinjtë e opozitës”.
Kreu i Qeverisë ka ndarë sërish shifra nga shpenzimet e tij për udhëtimet jashtë vendit. Rama shton se këto shpenzime përgjatë dy viteve janë më pak se gjysma e shpenzimeve që ka kryer Sali Berisha, kur ishte kryeministër.
Sipas Ramës, shpenzimi mesatar vjetor i Berishës për udhëtimet jashtë në vitin 2012 ka qenë 226.893 lekë të reja, kurse i tij në vitin 2020 ka qenë 193.331 lekë të reja.
Pra në 2 vite e 9 muaj të përdorimit të avionit promocional Albania me një marrëveshje të favorshme me Air Albanian,udhëtimet e mia u kanë kushtuar taksapaguesve më pak se gjysma e udhëtimeve të shpifarakut më të ulët në historinë e Shqipërisë,kur fatkeqësisht ishte kryeministër!
— Edi Rama (@ediramaal) October 29, 2022
Kujtojmë se dje, ish kryeministri Sali Berisha i ka quajtur superskandal udhëtimet me avion charter 137 herë të kryeministrit Rama pas publikimit të të dhënave nga hakerat iranianë. Berisha u shpreh në konferencën për mediat se në 8 vite në mandatin e tij si Presidenti i SHBA, Bush ka udhëtuar me Air Force One 74 herë, sa gjysma e Ramës, duke theksuar se abuzimi shkon në 22 milionë euro.
Discussion about this post