Gjykata e Posaçme e Apelit ka lënë la në fuqi masën e arrestit me burg për Thoma Gëllçin , ish drejtorin e RTSH që akuzohet për shpërdorim detyre lidhur me një tender për blerje pajisjesh për kanalin RTSH agro. Apeli ka rrëzuar kërkesën e avokatit të tij mbrojtës Dorjan Metalia, i cili kërkoi masë më të butë duke lënë në fuqi shkallën e parë, dhe të lërë në burg Gëllçin deri në përfundim të hetimeve.
“Gjykata e Posaçme e Apelit për Korrupsionin dhe Krimin e Organizuar, në zbatim të nenit 249/6 të K.P.r. Penale, vendosi: Miratimin e vendimeve nr 79, dt 07.10.2021 dhe nr 80, dt 11.10.2021 të Gjykatës së Posaçme të Shkallës së Parë për Korrupsionin dhe Krimin e Organizuar” thuhet në njoftim.
Në seancën zhvilluar me dyer të mbyllura Gëllçi ka mohuar akuzat e ngritura nga SPAK për shpërdorim detyre në lidhje me tenderin prej 86 milion lekësh për blerje pajisjesh për kanalin RTSH agro. Prokuroja Doloreza Musabelliu paraqiti në gjykatë faktet ku sipas hetimit, Gëllçi ka nisur procedurat e tenderimit ende pa marrë miratimin për hapjen e këtij kanali nga AMA i cili më herët kishte refuzuar mbylljen e kanalit RTSH fëmijë për ta zëvendësuar me RTSH agro. Gëllçi po ashtu akuzohet se ka favorizuar firmën fituese të tenderit duke zgjatur afatin e dorëzimit të produkteve, ndërsa avokati i tij foli për një inskenim që lidhet për të penguar rikandidimin për të qenë në krye të RTSH.
Arrest me burg është lënë në fuqi edhe për 2 teknikët e komisionit të vlerësimit të ofertave që firmosën tenderin. Burg është caktuar për Julian Tapian dhe Ervin Muraj. Ndërsa në kërkim vijon të jetë Alban Malaveci, ku sipas sistemit TIMES, rezulton të jetë larguar në Itali rreth 1 vit më parë.
