Me vendim të Gjykatës së Posaçme paraditen e sotme, është pranuar kërkesa për gjykim të shkurtuar ndaj ish-truprojës së Saimir Tahirit, Hekuran Marku.
Në momentin që dosja ka kaluar për gjykim në seancën paraprake, ai kërkoi gjykim të shkurtuar. Ndërkohë mësohet se kjo kërkesë është pranuar sot nga GJKKO.
Ish truproja e Tahirit u vu nën akuzë për trafik narkotikësh në kuadër të grupit të strukturuar kriminal.
Nëse shpallet fajtor Marku do përfitojë uljen me 1/3 e dënimit. Marku akuzohet se ka qenë pjesë e një grupi kriminal bashkë me Agustin Dedën, ish shoqëruesin tjetër të Tahirit dhe kanë kultivuar parcela me kanabis.
Të dhënat për aktivitetin e tyre kanë dalë nga një prej bashkëpunëtorëve të drejtësisë, megjithatë vetë Marku ka mohuar akuzat dhe kërkon pafajësi në gjykatë. Kujtojmë se më 1 prill Marku u ekstradua drejt Gjermanisë, për tu përballur këtu me akuzat.
Agustin Deda dhe Hekuran Marku dy ish truprojat e Tahirit, akuzohen se janë përfshirë në trafikun e drogës të zbuluar nga operacioni “Shpirti”.
31 anetarë të katër grupeve kriminale që trafikonin lëndë narkotike u arrestuan në kuadër të operacionit “Shpirti” nga Prokuroria e Posaçme kundër Krimit të Organizuar dhe Korrupsionit, falë një hetimi të zhvilluar në bashkëpunim me Italinë dhe të koordinuar me Eurojust-in, agjencia e Bashkimit Europian për bashkëpunimin gjyqësor në luftën kundër kriminalitetit.
Discussion about this post