Edmond Duzha 41 vjeç dhe Bekdash Cukalla 38 vjeç, kanë lënë qelitë e paraburgimit në Sarandë, pas përfundimit të afateve. Masa ndaj dy të dyshuarve është ndryshuar më 29 shtator të këtij viti, nga “arrest me burg” në “arrest shtëpie”.
Ata janë të dyshuar për vjedhjen e 173 milion lekëve në 11 dhjetor të vitit 2021 në supermarket Halo të Sarandës dhe ranë në prangat e policisë më 29 dhjetor 2021.
Megjithëse Prokuroria kërkoi zgjatjen e afateve të paraburgimit me 3 muaj, përsëri nuk arriti të gjente prova të mjaftueshme që implikonin ata në këtë veprimtari, duke bërë që ata të lënë qelitë sipas parashikimit të nenit 263 të Kodit të Procedurës Penale.
Prokurori ka vlerësuar të domosdoshëm zgjatjen e afatit të paraburgimit për secilin prej të paraburgosurve edhe me 3 muaj, por sipas ligjit “Zgjatja mund të bëhet vetëm një herë dhe nuk mund të jetë më shumë se tre muaj” dhe si rrjedhoje afati 9 mujor ka përfunduar në 29 shtator.
Kështu, Prokurori vlerësoi se në rastin konkret, masat e sigurimit “arrest në shtëpi”, parashikuar nga neni 237 i Kodit të Procedurës Penale, është masa e sigurimit më e përshtatshme në raport me të gjitha masat e tjera të sigurimit personal të parashikuar nga ligji procedural penal, që duhet të caktohen në vijim ndaj çdonjërit prej shtetasve nën hetim.
Discussion about this post