Akuzohet se strehoi Marklen Hakën, Gjykata jep vendimin për Klajdi Hakën

Gjykata e Tiranës ka dhënë masën e sigurisë “arrest me burg” për Klajdi Hakën.

Ky i fundit akuzohet se ka strehuar emrin e shumëkërkuar të drejtësisë, Marklen Hakën.

Gjatë kontrollit në banesën ku ai strehohej u gjet një armë zjarri. Për këtë arsye, Klajd Haka akuzohet edhe për armëmbajtje pa leje.

Para togave të zeza, i riu nuk ka pranuar të flasë dhe të japë shpjegime për akuzat.

Marklen Haka ishte shpallur në kërkim ndërkombëtar nga SPAK në kuadër të dosjes “Revanshi”.

Të premten, RENEA dhe policia e Tiranës në një operacion arrestuan në zonën e Niklës Marklen Hakën, një nga anëtarët e bandës së Niklës.

Ai akuzohet se është përfshirë në planet për vrasjen e Durim Bamit. Haka ka qënë i shoqëruar edhe për atentatet e mëparshme ndaj Gentjan Bejtjas, i cili u vra në banesën e tij në Larushk të Fushë Krujës.

Ndërkohë edhe vetë Marklen Haka i ka shpëtuar disa atentateve, që dyshohet se kanë ardhur për shkak të prishjes së pazareve të drogës.