Nënkryetari i PD, Alfred Rushaj, deklaroi sot se pallati nr. 4 në rrugën “Myslym Keta” në Tiranë nuk është për t’u prishur dhe se banorët mund të jetojnë aty. Gjatë deklaratës Rushaj akuzoi kryebashkiakun, Erion Veliaj, se do të prishë pallatin për të ndërtuar aty përbindëshat për interes të kompanive mike.
Por, Bashkia e Tiranës ka publikuar ekspertizën e Institutit të Ndërtimit të kryer mbi këtë pallat, pas tërmetit të 26 nëntorit, ku i tregon Rushaj se pallati është dëmtuar shumë dhe është gati në shembje
Bashkia shprehet se, sipas rezultateve të akt ekspertizës, ka dalë se pallati është për demolim dhe se kostoja e rikonstruksionit të tij shkon 116% të vlerës. Sipas ligjit shqiptar, nëse vlera e rikonstruksionit të një ndërtese e kalon në 70% vlerën që duhet për ta rindërtuar, kjo ndërtesë duhet të prishet për t’u ndërtuar nga e para.
Nga inspektimet dhe analizat e kryera vihet re që tërmeti i datës 26.11.2019 ka lënë pasoja dhe dëme të konsiderueshme në strukturë dhe jo vetëm, ku dallohen qartë edhe çarje mbi hapësirën e dritareve, çarje diagonale në mure mbajtës e krisje diagonale në mure mbajtëse, etj.
Ekspertët arrijnë në përfundimin se asnjë nga muret mbajtës të pallatit nuk e ka kaluar testin dhe për pasojë strehimi në to i familjeve do të mund të krijonte një tjetër tragjedi me pasoja si ato të tërmetit të dy viteve më parë, ku pati dhe humbje jete.
Kujtojmë se, pas daljes së ekspertizave dhe oponencës, Këshilli Bashkiak miratoi vendimin nr. 22 , datë 01.03.2021 për prishjen e pallatit sipas sugjerimit të ekspertëve. Por, ky vendim është kundërshtuar nga opozita, duke thënë se këto janë manovrat e Veliajt për të vazhduar me projekte që shërbejnë për pastrim parash.
