Afro 50% e shqiptarëve të grupmoshës 30-79 vjeç vuajnë nga hipertensioni.
Alarmi është dhënë nga Organizata Botërore e Shëndetësisë, sipas së cilës vendi ynë ndodhet mbi mesataren globale përsa i përket numrit të personave të prekur me hipertension. Janë afro 800 mijë persona të prekur me hipertension.
“53% e vdekjeve botërore janë kardiovaskulare. Faktorët që ndikojnë janë mosha, hipertensioni, diabeti, duhani dhe mungesa e aktivitetit. Një pjesë e mirë e pacientëve janë të panjohur me sëmundjen, sëmundja e heshtur që në 50% të rasteve vjen pa ankesa, pra pa dhimbje koka, pa marrje mënd, pa zhurmë në vesh, pa humbje ekuilibri. Ndërsa 50% të pacientëve të tjerë kanë disa nga këto shenja dhe bpën që t’i orientohet kardiologut.” – tha Taulant Gishto, kardiolog në QSUT.
Akoma më shqetësues është fakti se vetëm 11% e të prekurve me hipertension në Shqipëri e mbajnë nën kontroll atë.
“Ai mund të jetë me tension shumë të lartë, ndërkohë që nuk ka asnjë shenjë klinike dhe kjo nuk e bën të prirur të marrë mjekim dhe ta mbajnë nën kontroll.”
I cilësuar si vrasësi i heshtur, hipertensioni së bashku me diabetin dhe mungesën e aktivitetit fizik po rrisin edhe numrin e të prekurve me sëmundjet kardiovaskulare.
“Shumë pacientë, vetëm me stil jetese e kanë menaxhuar hipertensionin ose kanë ndryshuar stadin e hipertensionit. Pacientë të cilët më kanë ardhur me stad të tretë, pas një stil jetese shumë të shëndetshme, kanë arritur ta zbresin në stad të dytë apo të parë. Në vizitat që mund të bësh ambulator ti shikon që ke po aq të rinj sa edhe të moshuar”
Nga të prekurit me hipertension, 63% janë gra dhe 37% janë meshkuj./Tv Klan
Discussion about this post