Një alarm për një bombë të dyshuar në ambientet e hotelit luksoz “Plaza” ka vënë në lëvizje forcat e rendit pasditen e sotme në kryeqytet, duke shkaktuar momente shqetësimi dhe paniku në një nga zonat më të frekuentuara të Tiranës.
Sipas burimeve zyrtare nga Policia e Tiranës, ngjarja ka nisur rreth orës 19:35, kur një punonjëse e stafit të hotelit ka telefonuar në Sallën Operative, duke raportuar një thirrje anonime të marrë në recepsion, ku pretendohej se në parkimin e hotelit ishte vendosur një sasi eksplozivi.
Menjëherë pas telefonatës, në vendngjarje janë dërguar forca të shumta policore dhe njësitë xheniere të specializuara për çaktivizimin e mjeteve shpërthyese. Policia ka ndërmarrë masa sigurie për të garantuar mbrojtjen e qytetarëve dhe stafeve të bizneseve në zonë. Zona përreth hotelit është rrethuar, ndërkohë që është realizuar një evakuim i pjesshëm i ambienteve përreth, si dhe ka nisur boshatisja e godinës së hotelit në mënyrë të kontrolluar.
Forcat xheniere kryen një kontroll të plotë të parkimit dhe zonave të tjera të hotelit, për të identifikuar ndonjë mjet apo objekt të dyshimtë.
Përfundon kontrolli, nuk u gjet asgjë e dyshimtë
Pak orë pas ndërhyrjes, Policia e Shtetit doli një njoftim përditësues, ku sqaroi se nuk është konstatuar asgjë e jashtëligjshme apo ndonjë mjet i dyshuar eksploziv në ambientet e kontrolluara.
“Gjatë kontrollit nga shërbimet e Policisë në bashkëpunim me forcat xheniere, nuk u konstatua asgjë e jashtëligjshme në parkimin apo ambientet e tjera të hotelit,” — thuhet në deklaratën zyrtare të Policisë së Tiranës.
Ndërkohë, hetimet janë në vijim për të identifikuar autorin ose autorët e thirrjes anonime, që çoi në një ndërhyrje të gjerë të forcave të sigurisë dhe pezullimin e përkohshëm të aktivitetit në një zonë të frekuentuar të qytetit.
Discussion about this post