Hervin Fora dhe Engjëll Hoxha nuk iu ndahen fondeve të Shëndetësisë, duke qenë se aty kanë krijuar tashmë tunelin e përvetësimit me ndihmën e zyrtarëve të tenderëve. Pavarësisht se cili ministër ikën apo vjen në krye të këtij sektori, oligarkët mbeten të njëjtë.
Këtë herë ata kanë përfituar tenderin “Mirëmbajtja Full Risk Pajisje mjekësore ne reanimacionin neonatal, pranimi me prodhues Viasys ose ekuivalent, Medison ose ekuivalent ”. Ky tender është nisur nga ish-ministrja Ogerta Manastirliu dhe është vulosur nga ministrja aktuale Albana Koçiu.
Kontrata kap vlerën 45 milionë lekë të cilat xhirohen pas një procesi tenderimi të mbushur me shkelje të rregullave bazë të përcaktuara nga ligji mbi Prokurimet Publike.
EUROMED shpk me pronarë Hervin Forën dhe Engjëll Hoxhën, është kompania e vetme që ka dorëzuar ofertë për këtë projekt. Për mungesë konkurrence, tenderi duhej të ishte anuluar. Por, ndoshta Manastirliu e ka lënë porosi që Koçiu dihet t’i marrë këto lekë.
Kështu, “shëndetësia falas” edhe sot po shënjohet me “Flamur të Kuq” nga monitoruesi Open Data Albania, si një alarm për babëzinë e zyrtarëve tanë.
Kontrata është firmosur nga drejtori i maternitetit “Koço Gliozheni”, Genci Hyska, i cili është një nga përgjegjësit përmes të cilëve ish-ministrja Manastirliu kalonte fonde tek biznesmenë të dyshimtë. Kujtojmë tenderin 115 milionë lekë i dhënë pa garë në janar 2022 kompanisë serbe “Messer Albagas”.
Pa licencë
Për më tepër pacientët mbeten në dorë të një kompanie e cila, sipas regjitrimit në QKB, nuk ka licencë për mirëmbajtjen e pajisjeve mjekësore.
E vetmja licencë që zotëron kompania fituese është për “Shërbime ndërhyrëse higjeno-shëndetesore”. Kjo do të thotë se “Euromed” mund të bëjë dezinfektim, dezinsektim, por mirëmbajta full risk e pajisjeve mjekësorë kërkon më shumë akoma.
Sepse Mirëmbajtja Full Risk Pajisjeve kërkon edhe riparimin e tyre, instalimin, vënien në përdorim, mbrojtjen nga çdo efekt i jashtëm dhe i brendshëm.
Duke marrë shembull nga kërkesat e tenderëve të tjerë, së paku Euromed duhej të zotëronte licencën TOMT (licencë për mirëmbajtjen e pajisjeve mjekësore), ku në rastin konkret lejohen me prodhim tjetër ( që është përcaktuar në dokumentet e tenderit), por kjo nuk do të thotë që firma të mos jetë i pajisur për licencë mirëmbajtje.
Sepse edhe në rregulloren e Politikave Kombëtare për Menaxhimin e Pajisjeve Mjekësore në Shqipëri theksohet se “Pajisjet mjekësore që janë të rrezikshme gjatë përdorimit ose shumë të komplikuara mund të kërkojnë licencë të veçantë për përdorim dhe mirëmbajtje”.
Gjithsesi, këto janë çështje ligjore që instancat përgjegjëse i shqyrtojnë më mirë, sepse vetëm fakti që një tender kaq i rëndësishëm është dhënë pa garë përbën rrezik të madh për pacientet.
Lexo edhe: Albana Koçiu dhe Silvana Bala qerasin Kadarenë me 991 MLN lekë pa garë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post