Deputetja e PD-së Albana Vokshi, ka sqaruar gjatë një interviste televizive se si do të procedohet me pjesëmarrësit nesër në Kuvend. Ajo tha gjatë një interviste televizive se, numri i personave që kanë firmosur dhe do të jenë prezent në stadiumin “Air Albania” ka shkuar mbi 5 mijë. Vokshi gjithashtu ftoi edhe kryedemokratin Lulzim Basha për të cilin tha se duhet të përballet me demokratët. Sipas saj, ky do të ishte një hap i mirë për të dhe për PD-në, në mënyrë që të mblidhen dhe diskutohen mendimet e të gjithëve.
“Do të jetë Kuvendi i demokratëve. Janë vetë anëtarët delegatët e Kuvendit Kombëtar të cilët kanë kërkuar tashmë kanë shkuar mbi 5000 numri i atyre që kanë firmosur por tashmë do të vijnë dhe shumë prej tyre që nuk kanë firmosur. Është bërë me dije që do të fillojë në orën 10:00 në stadiumin ”Air Albania”. Ishte e pamundur në asnjë prej ambiente të tjera të futeshin qoftë delegatët mbi 5000 apo anëtarët, apo të ftuarit e PD-së. Do të jenë delegatë e vendosur në një ambient krejt të ndarë nga pjesa tjetër e të ftuarve.
Do të ketë transparencë të plotë për numrin e delegatëve, për forumin për votimet që do bëhen atje, do të ketë votime shumë të rëndësishme të cilët do të ndërmerren nga vetë anëtarësia dhe së fundmi do të jetë më tej një hapësirë e lirë për çdo demokrat që do të dojë të marrë pjesë. Përderisa demokracia është votë, unë e kam ftuar dhe e ftoj dhe njëherë z. Basha të vijë nesër në Kuvendin e thirrur nga delegatët. Demokracia është 50+1”, tha ajo.
Ndër të tjera, Vokshi u shpreh se, Basha nuk do të arrijë dot mbështetjen që ka Berisha, prandaj nëse nuk bashkohet me 11 dhjetor më mirë la lëshojë karrigen dhe të japë dorëheqjen.
Discussion about this post