Albers Keko nderon Partizanin përballë Laçit dhe rikthen të kuqtë në krye

Partizani ka arritur të marrë një fitore minimale 1-0 në shtëpi përballë Laçit, një ndeshje e vlefshme për javën e 14-të të Kategorisë Superiore, duke rimarrë kështu kreun e renditjes.

Në fraksionin e parë të lojës kurbinasit ishin dominues, duke gjetur edhe rrugën e rrjetës që në minutën e ‘2 me anë të Manellarit pas një aksioni fantastik, por më pas goli u anulua për një pozicion jashtë loje të Prodanit gjatë aksionit.

Të dy ekipet iu drejtuan dhomave të zhveshjeveshe në pushimin midis pjesëve me rezultatin 0-0, teksa në fraksionin e dytë “demat e kuq” arritën të merrnin dhe “frenat” e lojës në dorë duke gjetur dhe golin e avantazhit në minutën e ’57 të ndeshjes.

Pas një harkimi në zonë nga e majta, Zeka me kokë goditi shtyllën e pastaj topi shkoi tek anësori tjetër Albers Keko, i cili me një diagonale gjeti rrugën e rrjetës.

Pas kësaj fitore, Partizani renditet i pari me 27 pikë, ndërsa Laçi mbetet në vendin e parafundit me 12 pikë.