Albin Kurti: Të konstituohet Kuvendi dhe të shmangen zgjedhjet e reja!

Kryeministri në detyrë i Kosovës, Albin Kurti, ka bërë thirrje për qasje pozitive dhe konstruktive nga partitë politike, në mënyrë që të përmbyllet procesi i konstituimit të Kuvendit, të formohet Qeveria dhe të zgjidhet presidenti i vendit, duke shmangur kështu mundësinë e zgjedhjeve të reja.

Kurti tha se për miratimin e propozimeve për nënkryetarë nevojitet edhe mbështetja e mazhorancës, ndaj, sipas tij, duhet të gjendet një dakordim sa më shpejt.

“Le të jemi pozitivë e konstruktivë dhe në këtë mënyrë të kemi Kuvend të konstituar, shpejt Qeveri të formuar dhe të kalojmë tek zgjedhja e kryetarit që duhet të bëhet në mënyrë që t’i evitojmë zgjedhjet e reja”, tha Kurti.

Duke komentuar deklaratën e përfaqësuesit të Listës Serbe, Slavko Simiq, lidhur me propozimin për nënkryetar të Kuvendit, Kurti tha se ajo ishte në kundërshtim me Kushtetutën e Kosovës dhe me betimin e deputetit.

Sipas Kurtit, propozimi i dorëzuar me shkrim për Simiqin si kandidat për nënkryetar është në përputhje me Kushtetutën, ndërsa deklarimi i bërë në seancën e Kuvendit ishte, siç e cilësoi ai, në “shpërputhje flagrante” me të.

“Vetëm ai propozim i cili është dërguar me shkrim është në përputhje me Kushtetutën”, deklaroi Kurti.

Kurti komentoi edhe një deklaratë të bërë nga një përfaqësues i grupit parlamentar, i cili kishte ndërlidhur qëndrimin e Simiqit me varrimin e Ratko Mlladiqit. Ai e përmendi Mlladiqin si përgjegjës për masakrën e Srebrenicës dhe kritikoi mënyrën se si ai është nderuar nga Serbia dhe Kisha Ortodokse Serbe.

Në fund, Kurti tha se çështja më e rëndësishme mbetet arritja e një marrëveshjeje për nënkryetarët e Kuvendit dhe shprehu shpresën që kjo të arrihet sa më shpejt me kryetarin e PDK-së, Bedri Hamzën, dhe kryetarin e LDK-së, Lumir Abdixhikun.

Çfarë ndodhi sot?

Çështja e nënkryetarëve të rinj të Kuvendit të Kosovës është kthyer në “pengesën” e re për formimin e institucioneve.

Pas më shumë se 60 ditë qëkur u certifikuan rezultatet e zgjedhjeve të 7 qershorit, Kuvendi të mërkurën zgjodhi Albulena Haxhiun kryetare e seanca u shty për shkak të “pengesës së re”.

Haxhiu e shty për të premten seancën me arsyetimin se duhet dakordim për nënkryetarët e Kuvendit.