Kryeministri i Kosovës, Albin Kurti thotë se Serbia nuk është e interesuar për arritjen e marrëveshjes finale.
Ai konfirmon se në muajin janar të vitit 2023 do të ketë nisma të reja për të përgatitur takimin e radhës në Bruksel.
Duke folur për planin franko-gjerman për dialogun, Kurti u shpreh për KosovaPress se caktimi i afatit deri në mars të vitit të ardhshëm, është bërë nga ndërmjetësit e dialogut.
“Është e pritshme që në janar do të ketë nisma të reja për të përgatitur takimet në Bruksel. Me datën 18 gusht ka ndodhur një takim në procesin e bisedimeve le të themi historik, por me h të vogël, pasi për herë të parë agjenda e ka pasur rendin logjik të gjërave. Trie javë më vonë u bë propozimi që e kemi konsideruar si bazë e mirë për bisedime të mëtejshme nga emisarët specialë, të cilët erdhën edhe në Prishtinë me atë që është quajtur iniciativa franko-gjermane për marrëveshjen që i përngjan dy Gjermanive me elemente dhe opsione të ndryshme.
Unë besoj se aty thirrja që bëhet në vlera demokratike evropiane është pozitive, por procesi negociator do të tregojë si do të shkojë më tutje. Por është e qartë se Serbia nuk është e interesuar për marrëveshje dhe dialog. Ajo është e interesuar vetëm për shkaktim të krizave në të cilat mandej shfaqet vet si faktor që i zgjidh ato”, theksoi Kurti.
Discussion about this post