“Aleate shumë e mirë”, Escobar mbështet rrugën euro-atlantike të Kosovës

I dërguari i Shteteve të Bashkuara të Amerikës për Ballkanin Perëndimor Gabriel Escobar ka shprehur mbështetjen e plotë të shtetit që përfaqëson, përsa i përket rrugëtimit të Kosovës në bashkësinë euro-atlantike. Ai e cilësoi Kosovën si një aleate shumë të mirë të SHBA dhe mike të mirë.

“Qëllimi i vizitës është për të shikuar mënyrën e bashkëpunimit me një aleate shumë të mirë dhe mike të mirë. Është miqësi e partneritet i bazuar jo vetëm në interes të përbashkët, por edhe në ndarjen e vlerave të njëjta. Kam dëshirë të shprehi mbështetjen e vazhdueshme amerikane për aspiratat euroatlantike të Kosovës dhe solidaritetin për Kosovën në këtë kohë krize”, ka thënë Escobar, që ka shtuar se SHBA-ja mbështet dialogun Kosovë – Serbi të ndihmuar nga BE-ja.

Ai ka thënë se është krenar që Kosova ka kontribuuar në agjendën e përbashkët. Pas takimit me Osmanin, Escobar është nisur drejt ndërtesës së Qeverisë për t’u takuar me kryeministrin Albin Kurti.