Kreu i grupit parlamentar i Partisë Demokratike, Alfred Rushaj, u shpreh sot i bindur se, vendi ynë po vuan rritjen e çmimit të energjisë elektrike për shkak të keqmenaxhimit dhe neglizhencës së qeverisë.
Gjatë konferencës me gazetarët, Rushaj u shpreh nëse shihen të gjitha bilancet, në muajin shtator KESH ka shtuar prodhimin e saj. Sipas Rushajt në muajin maj çmimi ishte më i mirë dhe qeveria mund ta kishte blerë energjinë, por si gjithmonë ne shkojmë tek gjërat më të shtrenjta se në fund të fundit paguajnë qytetarët.
Ndër të tjera ai tha se OSHEE ka detyrim ligjor për çka po ndodh në vend dhe duhet të japë llogari.
“Jemi munduar ta thjeshtësojmë skemën apo modelin e tregut sesi funksionon. Ky vit mund të quhet çfarëdo por jo krizë energjetike. Nëse do shohim bilancet do shohim se deri në shtator KESH ka shtuar prodhimin dhe jemi në një vit shumë të mirë energjetike. Gjatë gjithë vitit konsumojnë 4.6 miliardë kilovat, të gjithë personat që paguajnë faturën është aq, ndërkohë që 4.5 janë prodhuar deri më sot. Kjo është e rëndësishme sepse Kasakada e Drinit është vendosur për konsumim familjar. Çmimi që KESH ja shet OSHE është 1.5 lekë kilovat, çmimi duhet ishte rreth 12 euro për megaëat/orë ndërkohë që sot është 200 e ca euro. Tërësisht keqmenaxhim, nuk ka të bëjë kriza aspak.
Nëse për një moment do të besonim atë që thotë Rama se nuk kishim asnjë mundësi për ta shitur me çmim tjetër energjinë elektrike, OSHE që ka detyrimin ligjor, a nuk duhet që këtë energji duhet ta blinte në prill apo në maj kur secili e di se çmimi do të ishte më i lirë. Në maj ka qenë 3.5 herë më lirë sesa çmimi me të cilin qeveria ka blerë energjinë. Aty kanë një konkurrencë, se cili gjeneron më shumë lekë për kompaninë e vet. Është e papranueshme që qytetarët shqiptarë të përballojnë krizën e keqmenaxhimit të operatorëve publikë”, tha ai.
PD që nga deklarata e Ramës pa ditë më parë është ngritur në akuza të fora duke nxjerrë herë pas here dokumente ku vërtetohet se kjo krizë ka ardhur për shkak të keqmenaxhimit dhe se Rama me atë deklaratë donte të përligjte skemën që e kishte hartuar që nga 2020.
