Ministria e Arsimit vazhdon të bëjë presion mbi studentët për vaksinimin me detyrim, duke iu thënë se nuk do të kenë mundësi të ndjekin mësim as online dhe as në auditorë.
Disa ditë më parë u lajmërua nga qeveria se procesi mësimor në universitete do të shtyhej për në datën 18 tetor.
Pas vendimit zyrtar fillestar se procesi mësimor në universitete do të niste me 11 tetor, Ministria e Arsimit ka thënë se e ka shtyrë datën për t’u dhënë më shumë kohë studentëve të vazhdojnë vaksinimin për t’i dhënë kështu mundësinë vetes të jenë të pranishëm në auditore. Por duke qenë se përsëri studentët nuk kanë shfaqur interes për t’u vaksinuar dhe duke parë këtë neglizhencë, qeveria ka nisur me mesazhe ku iu kërkon studentëve në mënyrë ultimatume që të vaksinohen.
Ajo ç’ka ka shkaktuar reagime është një postim i ditës së sotme tek faqja “Studentët denoncojnë” ku është publikuar një mesazh ku një nga universitetet në Tiranë u shkruan studentëve në email se të gjithë ata që nuk janë vaksinuar nuk do të lejohen në auditor dhe as nuk do të mund të kryejnë mësimin online.
Komentet e studentëve kanë mbushur foton pasi këtë e cilësojnë si një presion të pastër që ata të vaksinohen dhe pa dëshirën e tyre duke i privuar nga mundësia për të marrë pjesë në proces mësimor dhe online.
Studentët kanë dalë kundër këtij vendimi për vaksinim kundër dëshirës së tyre dhe kanë mbajtur protesta.
