Kryetari i Bashkimit Demokratik për Integrim (BDI), Ali Ahmeti, tregoi për gazetën “Lajm”, se tragjedia që ndodhi në spitalin modular të Tetovës është dhimbje e madhe për të gjithë qytetarët e vendit dhe në veçanti për familjarët e viktimave.
“Është dhimbje e madhe për të gjithë qytetarët e Republikës së Maqedonisë së Veriut. Është dhimbje e madhe për familjet që kanë humbur të afërmit e tyre dhe e tërë përpjekja bëhet të zbardhet e vërteta.
Në ndihmë për të vërtetën na kanë ardhur edhe nga vendet e Evropës Perëndimore, si nga Gjermania, NATO dhe SHBA. Opinioni pret që të dijë të vërtetën dhe familjet dhe familjet të dinë të vërtetën”- tha Ahmeti.
Ai gjithashtu shprehet se, kjo situatë nuk duhet përdorur për qëllime të politikave ditore sepse nuk i shëron dot plagët që janë shkaktuar.
“Nuk mendoj që kjo situatë duhet të përdoret për qëllime të politikave ditore sepse nuk i ndihmon dhe nuk i shëron dot plagët që janë shkaktuar. Të gjithë duhet të jemi racional. Askush nuk i është gëzuar kësaj tragjedie dhe ne do të përpiqemi që të zbardhim të vërtetën”- shprehet Ali Ahmeti.
Tetova vazhdon ende me ndërmarrjen e veprimeve për zbardhjen e rastit tragjik në Spitalin Modular ku humbën jetën 14 persona dhe 12 të tjerë shpëtuan në gjendje të stabilizuar shëndetësore dhe jashtë rrezikut për jetën.
