Nënkryetari i Partisë Demokratike Enkelejd Alibeaj e ka cilësuar reformën territoriale të miratuar nga Partia Socialiste dhe pa votat e demokratëve, një dështim. Alibeaj shprehet se kjo reformë duhet ribërë dhe se demokratët janë të gatshëm për t’u ulur në bisedime.
Ndër të tjera deputeti jep disa arsye se pse sipas tij ka dështuar kjo reformë, që lidhen sipas tij, me rikthimin e bashkive në reparte elektorale në favor të PS, në vend pune për militantët socialiste, dhe në institucione tenderësh abuzive.
“Bashkitë janë shndërruar në depozita punësimesh. Pushteti vendor i kthyer në reparte elektorale. Bashkitë aktuale asnjë shërbim qytetarëve”, ka thënë ai.
Theksojmë se në Shqipëri, me reformën territoriale të vitit 2014, u krijuan 61 bashki. Kryeministri Rama pak javë më parë, gjatë një interviste në emisionin “Opinion” u shpreh se është i idesë që ky numër bashkish të zvogëlohet edhe më.
Megjithatë Alibeaj është në kundërshtim me këtë ide, pasi zyrtari i lartë i PD-së mendon për më shumë bashki se c’janë, në mënyrë që qeverisja të vijë sa më afër njerëzve.
