Nënkryetari i Partisë Demokratike, Enkelejd Alibeaj, më një intervistë për mediat, është shprehur se vizita e sotshme e zyrtarit të lartë amerikan Gabriel Escobar nuk është rastësore, por për shkak edhe të situatës ku ndodhet PD sot.
Sipas tij, Escobar i konsideron shqiptarët dhe PD-në jo thjesht si një mik, por si një aleat dhe si një dhënie besimi ndaj kreut të PD-së, Lulzim Basha.
“Jo nuk është rastësi. Ai ka pasur një tur takimesh në rajon për shumë e shumë çështje, gjeopolitike, apo tensioneve të vendeve rreth nesh. Këtu ka ardhur edhe brenda kësaj suaze. I konsideron shqiptarët dhe PD-në jo thjesht si një mik, por si një aleat. Më lejoni t’jua citoj “si një aleat”. Dhe kjo është dhënie besimi i madh që i është dhënë PD-së, Lulzim Bashës në një lloj angazhimi kaq të madh për të gjithë vendin. Dhe zoti Escobar e tha në fund mezi pres që zoti Basha të vijë në SHBA” – shprehet Alibeaj.
Më tej ai tha se një parti ka rregullat e veta si funksionon, si organizohet, si bën zgjedhje, si respekton statutin e vetë. Për Alibeajn e vetmja gjë e mirë e 11-ës pastaj vjen 12-a dhe demokratët paksa të shfokusuar dhe të turbulluar do të kuptojnë që sfida e vërtetë për ta është lufta ndaj regjimit.
“Një parti ka rregullat e veta si funksionon, si organizohet, si bën zgjedhje, si respekton Statutin e vetë, edhe po të dojë të fillojë procedurat për ta nxjerrë qortimin, pakënaqësinë ndaj lidershipit, ka disa rregulla. Do të vazhdojë 11, 12, 18 dhe do të vazhdojë, një gjë është e sigurt, demokratët duhet të kthehen në një betejë, që ka vetëm një emër: Kundër Edi Ramës. Këto lëvizje PD-së i kanë sjellë një lloj shfokusimi, nuk e mohoj. E vetmja gjë e mirë e 11-ës pastaj vjen 12-a dhe demokratët paksa të shfokusuar dhe të turbulluar do të kuptojnë që sfida e vërtetë për ta është lufta ndaj regjimit. Tashmë me një risi, me SHBA në krah më fortë se sa më parë” – ka thënë Alibeaj.
Discussion about this post