Kreu i Komisionit Hetimor për Zgjedhjet e 25 prillit, Ekelejd Alibeaj, akuzoi PS-në se po përpiqet të pengojë hetimet për “masakrën zgjedhore”, për shkak se i druhen të vërtetave që mund të dalin nga hetimet. Përmes një deklarate për mediat ai e quajti këtë veprim të mazhoranës të turpshëm dhe absurd. Ai tha se deri duku priteshin pengesa nga mazhoranca sepse janë pikërisht sjelljet e një fajtori kur vihet përpara përgjegjësisë, gjithsesi Alibeaj tha që nuk priste këtë reagim që në mbledhjen e parë.
Sakaq, ai theksoi se këto veprime tregojnë që Rama është trembur nga Komisionin Hetimore, prandaj kërkon të shmanget. “Në orën 15:00 anëtarët u paraqitën në sallën e byrosë të ndodhur para një befasie të pakëndshme, një bojkot total i të gjithë anëtarëve të maxhorancës. Duket qartë që nuk kishte asnjë arsye. Arsyeja ishte që meqë jemi në javën e gjelbër të Kuvendit, sot po e marrim pushim dhe caktojmë një datë tjetër. Mazhoranca është e akuzuar dhe dokumentuar si vjedhësja hajdute shkatërruese e procesit të 25 prillit, është e pritshme që ata të bëjnë gjithçka për të penguar, vonuar zvarritur veprimtarinë e komisionit hetimor.
Nuk e prisja që të ndodhte që në mbledhjen e parë, duke ditur dhe përgjërimet për shtrirje dore, për dialog, për kthimin e veprimtarisë në forcë të plotë të parlamentit e çudia më e madhe ndodh, bojkot nga mazhoranca. Kjo tregon cila është qasja e Ramës dhe kësaj mazhorance që ka vjedhur zgjedhjet, mandatet e do përpiqet të bëjë gjithçka për të penguar që në sytë e shqipëtarëve të dalë e vërteta siç është”, tha Alibeaj.
Ndër të tjera Alibeaj tregoi hapat që do të ndjekin pas kësaj që ndodhi. Ai tha se opozita do vazhdojë të ndjekë hapat ligjore që iu diktohen për vazhdimin e komisionit dhe se do arrijnë që të zbardhin të vërtetën mbi zgjedhjet e 25 prillit. Ndërsa theksoi se Komisioni ka marrë edhe mbështetjen e ndërkombëtarëve.
“Unë me kolegët do ndjekim të gjithë hapat procedurale që Kushtetuta dhe ligji për komisionet hetimore përcakton.
Në fakt ne jemi këtu jo si detyrim i kërkesës që kemi bërë ne, por si detyrim i vendimit të Kuvendit për të mbledhur në një afat 3 mujor, sot është dita e gjashtë, nesër e shtata, e duket qartë që mungesa e arsyeve e justifikimeve, nuk patën as kohë të na jepni arsyet pse mungoni. Është strategji e qartë e pastër për të penguar veprimtarinë e hetimit të masakrës zgjedhore të 25 prillit. Unë e kuptoj fare mirë por ata që janë nën akuzë, jo vetëm prej nesh por edhe ndërkombëtarëve, është kjo pjesë e maxhorancës”, shtoi ai.
Ndërkohë, duke përfituar nga prezenca e mediave, Alibeaj bëri publike edhe orën e takimit të radhës, të premten në orën 10:00 të paradites.
